Kodigo sa Eksam

Nagdali-dali  ko nga nagdagan-dagan
Sa Room 13 ang akong padulngan
Paboritong bangko ako pa untang malingkuran
Haay, pagkahayahay kay wala pa si Sir Bantay.

Ako dayon gipangita ang among tap wan
Aron kung magkalisud naa ko'y masundugan
Apan pastilan pagka dili nako bulahan
Kay siya naa naman diya tapad daan.

Sa daplin ako mipahimotang
Gikuha ang bolpen ug notebok sa silingan
Sa gamayng papel gipangsuwat tanan
kutob sa mabasahan bisag wa masabtan.

Sa pagkahuman daw ako gibunalan
Sa kasakit sa kamot ug sinuwat sa masundugan
Hinay hinay gipilo ka pituan
aron masakto sa gamayng sudlanan.

Sa sitsit ni klasmeyt akong nabatyagan
Nga si Sir Bantay naa na diay sa pultahan
Mitindog ko pinakalit kay nakulbaan
Sa maestrong murag multo sa atubangan

Dili madayon ang eksam! ang akong nadunggan
Kay wala nakabuhat ang among maam
Unta dili na mag exam si maam,siyagit sa tanan
Murag mga bata nga nakadawat ug dulaan.

Mihawa ko nga sakit sa dughan
Kay ang akong hago wala'y hinungdan
Sa kakulba intawon ako nahuwasan
Bisag ang gamayng kodigo wa tawn napuslan.