Titser, Ngano?

Sayo sa kabuntagon, ikaw na akong nasud-ong

Pagkapait pamalandongon kung akong adlaw puno sa imong pagpamadlong

Unsa man ka? Nganong murag labaw pa ka ni mama?

Unsa man ka? Nganong murag ikaw man si papa pag-modisiplina?

Buot ko nga likayan ka, aron sa DOTA mobida

Buot ko nga mupalayo nimo, aron sa MALL maglakwatsa.

Apan ngano sa imong pulong ako man makuyawan

Ug sa imong kaisug ako nahimong talawan.

Nganong kinahangalan pa man ka sa tunghaan?

Nga sa palibot naa nama'y internetan.

Nganong ikaw pa man ang among tuohan?

Nga sa wikipedia, ang tanan pwede na mahibaw-an. 

Inigkahuman sa klase pagkadaku sa akong ngisi

Kay makalikay na ko sa imong sum-ol nga pisngi

Kadako sa akong katawa kay ang klase human na

Apan pastilan pirting paita! Asaynment, gibinlan pa!

Pagklisud nimo tugkaron, pagkalisud nimo ilailahon

Nganong giagwanta nimo ang among pagpabadlong

Unsa man kadaku imong naangkon

Kay bisag kami imo mang daginoton

Diri sa akong lingkuranan, ikaw ra ang nahuna-hunaan

Unsa kaha'y gahum imo nakuptan, akong gusto mahibaw-an
Kadaghan sa pwede nimo maadtuan
Nganong kami imong gi-agwantahan?

Kadaghan namo nga dili nimo kadugo

Pero imong giatiman labaw pa sa inahan
Nganong ing-ana man ang imong batasan?
Dili nako masabtan, pero akong gihimong sumbanan.

Una ko motindog, palihug titser , tubaga kining akong pangutana:

Ngano, titser? Ngano?