Piyong nga Mata

 

Asa ta ka pangitaon kun bisan sa langit walay bisag usa ka bitoon?

Ang piyong niyang mga mata nagsud-ong sa imong katahum

Iyang gipamati ang talagsaong kaanyag sa imong tingog

Iyang nasaksihan ang gugma nga gituyhad sa imong bukton

Iyang gipangandoy nga ikaw iyang makab-ot ug maangkon.

Sa paghimaya sa imong ngalan iya kang gihalaran

Sa gugmang matuod talagsaon gyud lamang

Gidawat mo apan mga kamot nakakumo

Susama sa punyal nga nagsamad sa iyang dughan

Ang piyong niyang  mga mata daw tubig nga nagtubod

Sa kusmod nga nawong nidagayday hangtud sa iyang tuhod

Bout banwason ang mga tunok sa sampinit na didto namilit

Apan pagkaubay-ubay gayud kay bisan usa dili man gyud malabnit

Daw natak-opan sa itom na panganod ang iyang kalibutan

Sa imong pagkahanaw nga puno sa misteryo

Asa man ka niya pangitaon kun sa langit walay bisag usa ka bitoon

Unta naa lang ka sa minteryo aron kada kilat ikaw iyang maadto

Pagpangamuyo ug pagbakho iyang nahiaguman

Asa man intawon ang imong kalooy ug panabang?

Nganong midilaab man ang kabugnaw sa imong dughan

Imo na lang ba gyud siyang biyaan ug pasagdan?

Ang bidlisiw sa adlaw mibuka sa piyong niyang mga mata..